Menu

Angajoqqaarsianut

Nunatsinniit Danmarkimut efterskoleriartut tamarmik, Naalakkersuisuniit taperneqartut, angajoqqaarsiaqassapput.

 

Angajoqqaarsiat pisussaaffii

Angajoqqaarsiat efterskolertumut angajoqqaat sinnerlugit akisussaasuupput. Taamaammat pimoorussussaavoq. Uku suliassarissavasi:

  • Efterskolertussaq tikilerpat timmisartoqarfimmut/qimuttuitsoqarfimmut/Kalaallit Illuutaannut aassallugu
  • Atualernissaata tungaanut inisimasuutissallugu.
  • Ulloq siulleq atuarfimmut ilagissallugu.
  • Tikippat ullut 5-t qaangiutsinnagit efterskolimut - atuarfimmik ungasikkaanni - najugaqarfia nuutsinnissaa.
  • Efterskolertup sygesikringskortissai, sungaartoq tungujortorlu, pissarsiarinissai. Tungujortoq aatsaat piniarneqarsinnaavoq angajoqqaanit pisinnaatitsissummik peqqaarluni.
  • Atuanngiffinni efterskolertoq inisimasuutissallugu. Soorlu ukiakkut  atuanngiffimmi, juullikkunni, ukiukkut atuanngiffimmi, poorskimi, pinsimi weekendinilu atuanngiffinni. Atuarfik atuanngiffissanik allassimasuutaa qinnutigisinnaassavarsi.
  • Efterskolertoq napparsimanerani atuarfiup ilissinninnissaa qinnutigippagu aammalu nakorsiarnerani ilagineqassappat assigisaalu.
  • Atuarfimmi angajoqqaanut ataatsimiitsitsinermi sutitsisinernilu peqataasarnissaq.
  • Angerlalernerani pisariaqartinneqarpat inisimasitillugu.
  • Angerlamut aallariartornerani isumagalugu.

Tassa naatsumik oqassagaanni: Efterskolertumut angajoqqaarsianngoraanni, soorlu tassa meeqqamik ataatsimik isumagisassamik ilalluni. Taamaasilluni efterskolertup efterskolernera tamaat angajoqqaarsiat efterskolertoq sumiinnera nalusassannganngilaat.

 

Angajoqqaallu isumaqatigiissusiussaasi

Angajoqqaarsianngoraanni pingaarpoq uku angajoqqaallu isumaqatigiissusiorsimassallugit:

  • angajoqqaasianut angalasarnerisa aningaasartuutaat
  • aningaasat kaasarfimmiussai
  • angajoqqaarsianiinnerani saniatigut aningaasartuutit
  • malittarisassat: Soorlu pujortartarneq, unnukkut qassinut angerlareersimasarnissaa assigisaallu
  • qanoq akulikitsigisumik tikeraartarnissaa
  • qanoq akulikitsigisumik efterskolertup angajoqqaat oqaluuttassanerai - maanngaanniit akulikittannginnissaa siunnersuutigisarparput, sumiiffimmini inooqataalluarnissaa aammalu qallunaatut ilikkapallannissaa anguniarlugu

 

Sukumiisumik akuunissarsi

Efterskolimi sutitsisoqartillugu akuusarneq akisussaaffimmik tigusilluarnissinnik takutitsissaaq aammalu efterskolertup attaveqaataanut ilaalluassagassi - soorlu atuarfik  uagullu aamma taamaattugut.

 

Ajornartorsiornermi

Efterskolertup ilissilu akornassinni ajornartorsiuikkussi, aaqqiiniaqataasussatut attavigineqarsinnaavugut. Angajoqqaarsiaarusukkunnaarussi sukkanerpaamik attaveqarfigissavatsigut.

Angajoqqaarsiaarusukkunnaarussi uagut "taartaasinnaanngilagut", tassami isumaqatigiissusersi angajoqqaallu isumaqatigiissutaammat. Angajoqqaarsiaarusukkunnaarussi angajoqqaat namminneq nutaamik nassaarnissaq akisussaaffigaat.

Paasititsissutigiinnassavarput, efterskolertoq angajoqqaarsiaqanngikkuni uniinnartariaqassammat angerlartitaallunilu.