Menu

Paasissutissat nalinginnaasut

Efterskolet tassaapput inuusuttunut 14-iniit 18-inik ukiulinnut kostskolit (atuarfiit nerisaqarfiullutillu ineqarfiusut). Taakkunani 8., 9. 10. klassimilu ilinniartakkat ilinniartitsissutigineqartarput.

Kikkut aqqutigalugit nassiussaanersut malillugit efterskolertut imak immikkoortinneqartarput:

  • Angajoqqaaminnit nammineq akiliullugillu isumagineqartut
  • Uddannelsesstyrelsen (Oqaatsinik Pikkorissarfimmiinnikut) aqqutigalugit efterskolertut, kalaallit illuuinillu isumagineqarlutillu aqqutissiorneqartartut
  • Kommuunit aqqutigalugit efterskolertut

Odensemi Kalaallit Illutaat Danmarkip kujataani (Region Syddanmarkimi), nunatsinni Efterskolertunik Aqutsisoqarfik qanimut suleqatigalugu, nunatsinnit efterskolertunut pisortatigoortumik aqutsisuullunilu aqqutissiuisuuvoq.

Efterskolertoq

Efterskolissagaanni iluarnerpaavoq efterskolertussap inerisimanissaa akisussaaffimmillu tigusisinnaanissaa. Soorlu:

  • efterskolertoq nammineq ullaakkut makissinnaasariaqarpoq
  • errorsisinnaassariaqarpoq
  • inuppassuarnik nutaanik naapitsinissaminut piareersimasariaqarpoq
  • nipituumiissinnaasariaqarpoq
  • qallunaatut oqalukkusussinnaasariaqarpoq

Misilittakkatta takutippaat, efterskolertut ukiukinnerit inerisimannginnerusullu unitsitsiinnarnerusartut.

Efterskolemik toqqaaneq

Efterskolemik toqqaaniarnermi, misissugassaassaaq efterskoleq aalajangersimasumik sammisaqartitsisartuunersoq. Soorlu:

  • Atuagarsorneq
  • Nipilersorneq
  • Timersorneq
  • Upperisarsiorneq
  • Allanik immikkut ittunik pisariaqartitsisunik pikkoriffeqarnersut

Maanngaanniit siunnersuutigissavarput efterskoleq angivallaanngitsoq toqqarneqassasoq. Taamaasilluni efterskolip meeqqat ataasiakkaat piffissaqarfiginerullugillu pisariaqartitaat malillugit sullilluarsinnaanerussavaat.

Danmarkimi efterskolet pillugit suli misissuerusukkuit nittartagaq efterskole.dk alakkarsinnaavat (qallunaatuujuvoq).

Qinnuteqarneq

Tapisinissamut uku tunngaviusumik piumasaqaataapput:

  • Efterskolertussap angajoqqaavilu ullup efterskolerfiusup aallartinnera sioqqullugu ukioq ataaseq nunatsinni najugaqarsimasariaqarput
  • Efterskolertussaq ukiuni 8-ni atuareersimassaaq 14-17-inik ukioqassalluni
  • Efterskolertussaq Atuartitaanermi Ministeriaqarfimmit akuerisamik efterskolemi akueritereersimassaaq
  • Efterskolertussaq ilaqutariinnik attaveqaateqassammat (kontaktfamilie)
  • Qinnuteqaammut ilanngunneqassapput:
    • Kuisinnermut allagartaq,
    • efterskolertup najugaqarfigisimasaasa allattorsimaffiat (historisk bopælsattest)
    • ilaqutariillu najugaqatigiinnerannut uppernarsaat (bopælsattest for husstanden)

Nunatsinnit tapisiaqarnissamut qinnuteqarneq killeqanngilaq, taamaallaat Efterskolertunik Aqutsisoqarfiup angalanissaq isumagissappagu qinnuteqarnissamut marsip 15-iat killigitinneqarpoq.

* Meeqqat angerlarsimaffiup avataani inissinneqarnikut aamma innarluutilittut nalunaarsornikut (vidtgående handicap) efterskolenut qinnuteqarniarunik meeqqap kommunerisaani sullissisuatigoortariaqassaaq.

Tapiissutigineqarsinnaasut

Ukununnga tapertinnissamut qinnuteqarsinnaavusi:

  • Angajoqqaat atuarfimmut akiliutaanik annikillisaaneq
  • Efterskolertussap atuariartoqqaarnera naammassinermilu angerlarnera
  • Efterskolertup ilaqutaani qaninnerpaani napparsimaruloortoqarnerani imal. ilisiartornermilu angalanerit
  • Angojoqqaat efterskolertup napparsimaruloornerani imal. toqunerani angalaneri

Uani qinnuteqarsinnaavutit

Malugiuk: Juullip nalaani (juleferie) angalaneq taperneqarneq ajorpoq.

Ilaqutariit attaveqaatit

Tapisinissamut piumasaqaataavoq, efterskolertup pinngitsoornani efterskolertoq ilaqutariit attaveqaateqassasoq.

Ilaqutariit attaveqaatit toqqartinnagit eqqarsaatigineqartariaqarpoq efterskolemiit taakkununnga aqqutaata takivallaannginnissaa. Ungasippallaarpata efterskolemi akuusarnissaat killeqalissammat, aammalu efterskolertup taakkununnga angalasarnera akisuvallaalissammat. Tassami angalaneq Naalakkersuisunit akiliunneqarneq ajormat - angajoqqaat namminneq akilertartussaammassuk.

Nammineq nassaarsinnaanngikkaanni

Uagut ilaqutariit attaveqaatissarsiorneq ajorpugut, kisianni maani peqatigiiffiit inaataanni allagarsiivimmut allagarsiissutiliarsi nivinngarsinnaassavarput.

Angajoqqaajususi nammineerlusi Facebookikkut qinerlersinnaassaasi. Soorlu quppernerni "Kalaallit Danmarkimiittut", "Kalaallit Qallunaat Nunaanniittut" allallu kalaallit peqatigiiffii. Soorlu qinerliutigisinnaavasi oqaatsit "Grønlændere" aamma "Kalaallit".

Aamma efterskolimiittut toqqarlugit ikiusinnaanersut aperisinnaavasi, kisianni nalussanngilarsi ilaqutariit attaveqaatissarsiornermi ikiuinissaminnik pisussaatitaanngimmata.

Ilaqutariit attaveqaatinut piumasaqaatit ilaqutariit attaveqaatinngorniarnermut qinnuteqaatip quppernerata aappaani atuarsinnaassavarsi.

Taarsiiniaraanni

Efterskolertoq nutaanik ilaqutariinnik attaveqaatitaarpat, immersugassaq nutaaq maanga Efterskolertunik Aqutsisorfimmulluunniit nassiunneqassaaq.

Aallannginnermi

Aallannginnermi angajoqqaat efterskolertussap nassatassai isumaginissaat pingaarpoq:

  • Passeq NemID-lu
  • Atuarfiup efterskolertumut nassataritikkusutai (ilaanni Danmarkimi pisiaralugit, Nunatsinnit nassiunneraninngaanniit, akikinnerusarpoq)
  • Efterskolemut ilaqutariit attaveqaatinullu pisinnaatitsissut. Taamaasilluni efterskoli ilaqutariit attaveqaataalluunniit efterskolertumut blå sygsikringskortimik (nunanut allanut angalatilluni napparsimaleraanni ikiorneqarnissamut qularnaveeqqussummik) qinnuteqaassisinnaanngussapput.

Meeqqat angalanermini sillimmasernissaa angajoqqaat namminneq isumagisassaraat.

Efterskolertussap nassatassai tamarmik timmisartukkut nassarsinnaanngippata, sinneri umiarsuakkut efterskolimut imal. ilaqutariit attaveqaatinut nassiunneqarsinnaapput. Uani angajoqqaat nassiussineq imal. oqimaappallaanik nassataqarnermi akiliutit namminneq akisussaaffigaat. Qanoq nassataqartigeqqusaaneq timmisartortitsiviup nittartagaani atuarneqarsinnaavoq. Soorlu Air Greenlandip nassatanut piumasaqaatai uani atuarneqarsinnaapput. 

Aamma eqqaamassavarsi pingaarluinnarmat ukiorsiutit nassartinnissaat.

Tikinneq

Nalinginnaasumik efterskolertussaq Danmarkimut tikikkuni ilaqutariit attaveqaataasa aassavaat, atuariartulerpallu atuarfimmukaallugu.  

Ukioq manna, efterskolertunngortussat, ilaqutariit attaveqaatiminnukartinnatik, Foreningen Grønlandske Børnip aaqqissugaanik ES-campimut ilaanikuupput. Tassani makku sammineqarnikuupput: Efterskolertaassami piumasaqaatit, kulturikkut assigiinngissutsit, Danmarkimi efterskolerneq qanoq innersoq, Danmarkimi angalaneq aammalu nunatsinnit efterskolertussanik allanik naapisimaarneq. Ataatsimoorneq naammassimmat sumiiffinni assigiinngitsuni Kalaallit Illuutaannukaanneqarnikuupput. Tassanilu ilaqutariit attaveqaataasut efterskolertussaq aavaat.

Danmarkimi angalaneq

Efterskolertoq qimuttuitsussappat "Ungdomsbilletter" pisiarineqarsinnaapput. Uani piumasaqaataaginnarpoq sygesikringskort (sungaartoq) takutinneqarsinnaanissaa. Aamma Ung klapsædebilletter 89 kr-nillit toqqarneqarsinnaapput (ulapaarfiup avataani).

Aamma Rejsekort-isisoqarsinnaavoq. Rejsekort angallatinut ilaasartaatsinut tamanut (bussit, qimuttuitsut, Københavnimi qimuttuitsut, metromi) atorneqarsinnaapput. Tassa akiliutitut nalinginnaasutut atorneqarsinnaavoq - taamaallaat angalanermut atatillugu. Paasissutissat qallunaatuut uani takusinnaassavatit.

Ilinniagaqalernissamut siunnersuineq

Ilinniagaqalernissamut qinnuteqarfissaq marsip aallaqqaataa tikitsinnagu efterskolertunut taakkulu atuarfimmi attaveqaataannut ilinniagaqalernissamut paasititsiniaasarpugut. Ukioq manna ulluni ukunani paasititsiniaassaagut:

  • Jylland, Region Syddanmark: Sisamanngorneq decembarip 6-at 2018 nal. 10 - 14 Kildevæld Efterskole-mi
  • Fyn qeqertallu allat, Region Syddanmark: Pingasunngorneq decembarip 12-at 2018 nal. 10 - 14 maani Kalaallit Illuutaanni

Qinnuteqarfissaq ulloq kingulleq: Novembarip 30-at 2018, Ilinniarnermut Aqqutissiuisumut Kistaraq Egede-mut ilaasussat atii mailerutigalugit.

Ilinniarnermut paasisaqarnerorusukkuit sullissivik.gl alakkaruk.

Nunatsinnit misilitsinnerit

Misiliutitut kalaaliaqqat Danmarikimi efterskolertut nunatsinnit kalaallisut allattariarsornermut misilitsikkusunnerlutik toqqarsinnaanngorpaat - ilinniarfigerusutap piumasaqaatai apeqqutaatillugit.

Kalaallisut misilitsikkusuttoqarpat, atuarfiup "Anmeldelse_Opgavebestilling" immersoriarlugu Nunatsinni Ilinniartitaanermut Aqutsisoqarfimmut decembarip 10-tinnagu emailerutigineqassaaq uunga: ila@nanoq.gl.

Ukua allattariarsornikkut misilitsiffigineqarsinnaapput:

  • Qallunaatoorneq
  • Tuluttut
  • Matematikki

Qinnuteqaatit uani aaneqarsinnaapput aammalu ilitsersuut uani.

Angerlarneq

Kalaallit efterskolertut angerlarnissaat imatut pilersaarneqartarpoq:

  1. Januaarip ingerlanerani angerlarniarnermut qinnuteqaat efterskolertup angajoqqaavinut nassiuttarpavut.
  2. Angajoqqaat atuarfik ilaqutariit attaveqaataallu qanimut suleqatigalugit immersoriarlugit uagutsinnut nassiuttarpaat.
  3. Uagut qinnuteqaat akuereriarlugu Grønlands Rejsebureauimut ingerlateqqittarparput.
  4. Angalatitsiviup, angalanissaq isumageriarlugu, qinnuteqaammi emailimut allassimasumut uagutsinnullu nassiuttarpaat.

Nassatat oqimaappallaarneranut akiuliutit angajoqqaat namminneq akiligassaraat. Qanoq nassataqartigeqqusaaneq timmisartortitsiviup nittartagaani atuarneqarsinnaavoq. Soorlu Air Greenlandip nassatanut piumasaqaatai uani atuarneqarsinnaapput.

Angerlarnissamut qinnuteqaat aana qinnuteqaasiornermullu ilitsersuut aana

Forsendelse af pakker

Efterskolertussap nassatassai tamarmik timmisartukkut nassarsinnaanngippata, sinneri umiarsuakkut angerlamut nassiunneqarsinnaapput. Uani angajoqqaat nassiussineq namminneq akiligassaraat.

Atugarliorneq

Atuartoq arlaatigut atugarliorpat piaartumik attavigineqassaagut. Taamaasilluni atuartoq, atuarfik, ilaqutariit attaveqaataallu qanimut suleqatigalugit ajornartorsuit aaqqinniarsinnaaniassavarput.

Unitsitsiinnarneq

Maanaannaq efterskolertoq atuarunnaarluni angerlassappat, angerlarnissaa Efterskolertunik Aqutsisoqarfimmit akilerneqassappat, piumasaqaataavoq angerlarnissaq sioqqullugu atuartup oqaloqatigereersimassagaatigut.

Efterskolimut allamut nuunneq

Efterskolimut allamut nuunniarneq angajoqqaat namminneq isumagisassaraat. Angajoqqaalli eqqumaffigissavaat nuunnermi akitsuuteqarsinnaasarmat, angajoqqaat namminneq akiligassaannik:

  • Efterskolimi qimalikkami akitsuut (aki aalajangersimasoq imal. sap. ak. 4-nut efterskolernermut akiliut - Danmarkimi naalakkersuisunit taperneqanngitsoq)
  • Efterskolerfittaassami allatsinnermi akitsuut qularnerveeqqullu

Efterskolertoq efterskolimut allamut nuunniarpat, immersugassaq "Efterskoleskift" immersoriarlugu uagutsinnut nunatsinniluunniit Efterskolinik Aqutsisoqarfimmut nassiunneqassaaq.

Ilaqutariit iluanni peruluttorqarpat toqusoqarpalluunniit

Efterskolertup qanigisaani (qatanngutit, aappat, meeqqat, angajoqqaat, aanaakkut, allallu qanigisatut isigineqarsinnaasut) peruluttoqarpat imal. toqusoqarpat, efterskolertup tassunga angalanera akilerneqarsinnaavoq. Taamaattoqassappat, angajoqqaat attaveqarfigissavaagut uppernarsaatinillu nassilluta. Taava uagut angalanissaa isumagisinnaassavarput.

Isiginnaagassiaq

Efterskolerneq pillugu kalaallisut isiginnaagassiaq uani takusinnaavat.

Facebookimi Danmarkimi efterskolertunut, angajoqqaavinut, ilaqutariit attaveqaataannut efterskolinullu qupperneq

Quppernermukarit

Paasisaqarnerorusukkuit

  • Mette Lund

    Ilinniarnermut aqqutissiuisoq

    +45 25 60 76 46

  • Kistaraq Egede

    Ilinniarnermut aqqutissiuisoq

    +45 22 42 08 13